عاجل : خطوات الاستقدام الجديدة عن تجربة التخطي إلى المحتوى

عاجل : خطوات الاستقدام الجديدة عن تجربة

عاجل : خطوات الاستقدام الجديدة عن تجربة
خطوات الاستقدام

وكالة اليوم الاخبارية – سوف نطرح لكم خطوات الاستقدام الجديدة التي أرسلها ابو ساجد في صفحة الجالية المصرية بالسعودية وذلك لكي تعم الفائدة على الجميع

 

كتب /  ابو ساجد

بصوا يا جماعه ركزوا معايا كده
1-فى الاول لازم يكون معاك شهادة الكلية او المعهد موثقه من الملحق الثقافى السعودى فى مصر و من القنصليه السعوديه فى مصر ..و دوله بتديهم لأى مكتب يخلصهولملك مقابل مبلغ يصل الى 2000 جنيه و بتيجى هنا السعوديه توثقها فى الخارجيه السعوديه ب 30 ريال غالبا مش فاكر اوى
و فيه مكتب اسمه البكرى للسفريات عند محطة مترو البحوث قبل دخلة شارع محى الدين ابو العز فوق صيدليات مصر ..واحد اسمه استاذ احمد البكرى و ده ارقام التليفونات لو حابب تستفسر عن حاجه 023366448-023366447
2-تحضر صورة من جواز سفر الزوجة و الاولاد و عقد الجواز(يفضل الالكترونى) و شهادة ميلاد الاولاد و تروح توثقهم كلهم من الخارجية
شارع البطل احمد عبدالعزيز المهندسين الجيزه ب 11 جنيه للورقه
((( لو عايز تبعت الورق من مصر للسعودية فى البريد السرسع ب 75 جنيه و يوصلك لحد البيت فى خلال 3 ايام عمل علشان متتعبش وتفضل تقول هجيب ازاى الورق من مصر)))
3- تدخل على موقع ابشر و تحاول تعمل طلب الكترونى و غالبا انه فى اغلب الحالات مش بينفع ..فتبدأ تحاول تأخد موعد من ابشر و لازم يكون بالك طويل علشان ممكن الموضوع ياخد وفت ..و افضل وقت لأخذ موعد من ابشر الساعه 8 -9 الصبح علشان المواعيد بتنزل فى الوقت ده (على حسب كلام موظف فى الاستقدام و عن تجربتى فى حجز الموعد
3- خدت موعد الحمد لله ..بتطبع ورقه كده اخر خطوه فى الموعد و بتبقى عليها باركود لازم تاخدها معاك علشان تأكد بها الموعد فى نفس يوم الموعد
4- بتحضر شهادة التخرج الموثقه و صور منها-عقد الجواز الموثق و صور منه-شهادة ميلاد الاولاد موثقه و صور منه-صورة من جوازات السفر للزوجه و الاولاد – صورة الاقامه- صورة الجواز بتاعك
5- تطلع بالليله دى كلها على مكتب الاستقدام و يكون معاك خطاب تعريف بالراتب ممضى و مطبوع على ورق الشركة او المؤسسه و مختوم و تروح توثقه بالختم الذهبى من الغرفة التجارية ب 25 ريال و تاخده و انت واقف
6- اول ما تروح الاستقدام ان شاء الله هتلاقى مكتب صغير كده تدخله علشان تأكد الموعد- بعدين بتجهز ورقك و تأخد رقم و تنتظر حتى يأتى رقمك و بعدين تدى الورق كله للموظف و متتكلمش خالص علشان و تروح تقعد و تنتظر . الموظف هيقول اسم تروح له يقولك اتفضل الورقة الصفراء
7- الورقة الصفراء دى تاخد بالك منها اوى لأنها تعنى الاستقدام
8- تصور الورق الصفراء و تبعتها لزوجتك فى مصر و هى تطبعها علشان تاخدها معاها تساهيل و بتبقى فيها اسم المستقدمين و اسمك طبعا و شوية ارقام كده مهمين جدا علشان هيحتاجوهم فى تساهيل
9- نتظر تدخل بعدها بكام يوم كده 4-5 ايام على موقع وزراة الخارجية السعودية -بحث عن تأشيرة استقدام هتلاقى الموقع نزل البيانات الموجوده فى الورقة الصفراء اللى معاك
10- كده بقى تحجز فى تساهيل ورقمه من الارضى 16116 و تاخد موعد..زوجتك تروح مكتب تساهيل قبل الموعد ب نص ساعه علشان تظبيط الورق و مش لازم تاخد الاولاد (جوازات الاولاد فقط معاها و جوازها طبعا و كل الورق اللى هيطلبوها منها فى التليفون او بماسج على الموبايل
11- بتروح تساهيل تسلم الجوازات و بتدفع حوالى 800 جنيه ..اعمل حسابك فى اكتر طبعا علشان الاسعار اكيد بتتغير كل مده و انا مش عارف انت هتشوف البوست ده امتى .بس كده كده هيقوللها على التكاليف ساعة الحجز من التليفون..و بيدوها ورقة الكشف الطبى
12- بتطلع بالورقة على معامل وزارة الصحة اللى فى شارع الشيخ ريحان فى ميدان التحرير
هتلافى ناس و هى فى اتجاهها الى المعامل بيقوللها (تعالى يا مدام خدى رقم) اوعى تروح لهم دول نصابين و حراميه ..اوعى تدى اى حد فلوس الا قى الخزينه اللى جوه المعامل ..اوعوا يا جماعه علشان موضوع المعامل ده مش بيكمل نص ساعه ساعه بالكتير و الناس دى تفضل تقولك اخلصك بسرعه و مش عارف ايه … اوعى ..اللهم بلغت اللهم فأشهد
13- فى الكشف الطبى فى المعامل بياخدوا عينة دم بس و بتروح بعدها على جمكا
14- جمكا تروحله ازاى ..تاخد تاكسى من قدام المعامل تقوله جامكا و اتفق معاه مش هياخد اكثر من 10-15 جنيه هى قريبه فى شارع الفصر العينى تفرعاته كده بس صدقا معرفش اسم الشارع ايه
– تطلع على جامكا تقف فى صف داخل سور جامكا علشان تصور الجواز و اوعى تدى الجواز لحد يقولك اخلصك و بسرعه و حوار …هتدفع 25 جنيه معرفش ايه لزمتهم و تديهم رقم موبايلك علشان يرسلوالك النتيجه
15- هتدخل جامكا تاخد رقم هتلاقيه مثلا 300 و اللى فى الخدمه مثلا 80 هتقول يااااا لهوى لسه بدرى ..لا لا هما بيمشوا بسرعه يعنلا ممكن تقعد لك ساعه او ساعه و نص بالكتير حتى لو رقمك بعيد
16- لما يقولوا رقمك بتطلع فوق بتديهم حوالى 250 جنيه بيدولك ورقة مكتوب فيها اسم المستشفى و مينفعش تقوله بعيد او شوف مستشفى قريب لأن الكمبيوتر بيوزع عشوائى كما قال لى الموظف
17- تاخد الورقة و تروح المستشفى اللى قالك عليها تسأل على فين كشف المسافرين او جامكا تكشف باطنه و نظر و اشعه و كام حاجه تانى كده .و بتدفع حوالى 640 جنيه
18- بس و بتروح و بترجع بعد اسبوع لتساهيل تديهم الجواز و تنتظر التأشيره و تساهيل بتبعت لك الجواز على بيتك حتى لو كنت مش من القاهره
19 – اول ما يجى الجواز تقول الحمد لله و تحجز طيران و توصل الاسره بألف سلامه
20- اعذرونى لو كنت نسيت اى خطوه بس ان شاء الله كاتب كل حاجه و بالتفصيل علشان الكل يستفاد و الله الموقف و ربنا يجمع كل واحد على اهله فى الخير يا رب و فى اقرب وقت
21- ادعولى بقى بتوسيع الرزق و صلاح الحال و اسف على الاطاله

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *